Sim-sim.az “Ədəbiyyat adamı” mükafatının ilk laureatlarının sözügedən mükafat haqda fikirlərini təqdim edir
Səlim Babullaoğlu:
“Əvvəla, icazə verin bu ilki mükafatçıları, həmkarlarımızı təbrik edim. Şəksiz, bütün ədəbi mükafatlar ədəbi prosesi stimullaşdıran əsas və ilk növbədə mənəvi amillərdəndir.
Bu bizim özümüzə, cəmiyyətin ədəbiyyat adamlarına və ədəbiyyata biganə olmamasının göstəricisidir. Əgər pul da varsa arxasında, demək daha yaxşıdır. İlin “Ədəbiyyat adamları” nın seçmə məsələsi məncə özünəməxsusdur, müəyyən qədər qapalıdır kriterilər. Hesab edirəm ki, bu da mükafatlar ətrafında adətən yaradılan xoşagəlməz söz-söhbətlərə yer qoymur. Azərbaycan Yaradıcılıq Fonduna, Kamal Abdullaya, Qismətə, uğurlar arzulayıram. Arzu edirəm ki, bu mükafatı uzun müddət verə bilsinlər.”
Nəriman Əbdülrəhmanlı:
“Ümumiyyətlə, xoş niyyətlə, ədəbi əsərlərin, namuslu ədəbiyyat adamlarının yaradıcılığının dəyərləndirilməsi məqsədilə təsis edilən və verilən mükafatların hamısına münasibətim müsbətdir. Dünya ölkələrinin əksəriyyətində bu cür onlarla mükafat var. Bu baxımdan “Ədəbiyyat adamı” mükafatının təsis edilməsi, məncə, ədəbiyyat sahəsində son illərin ən gözəl layihələrindən biridir. Qəlibdən uzaq yolla müəyyənləşdirilən ədəbiyyat adamları o mükafatı kifayət qədər ədəbi çəkisi olan sənətkarların əlindən qəbul edəndə verdiyi zövq daha da artır. Əminəm ki, Yaradıcılıq Fondunun bu layihəsi davamlı olacaq və nüfuzunu daim qoruyub saxlayacaq. Yeri gəlmişkən, ilk laureatlardan biri kimi, builki laureatları təbrik edirəm…”
Qeyd edək ki, Azərbaycan Yaradıcılıq Fondunun ötən ildən təqdim etməyə başladığı “Ədəbiyyat adamı” mükafatının qalibləri müəyyənləşib.
“Ədəbiyyat adamı” adlanan bu layihə çərçivəsində istər ölkə daxilində, istərsə də ölkə xaricində çoxşaxəli, çoxspektrli tədbirlər, konfranslar, poeziya gecələri, görüşlər, kütləvi açıq mühazirələr, qapalı seminarlar keçirilməsi, mükafatların verilməsi nəzərdə tutulub.
Fondun daxili müzakirələri nəticəsində aşağıdakı beş yazıçı bu ilin qalibi seçilib: Şərif Ağayar, Vaqif Yusifli, Vaqif Nəsib, Mehman Qaraxanoğlu, Aysel Əlizadə.
Mükafatın məbləği 1000 manatdır. Mükafat qaliblərə gələn həftə təqdim ediləcək.
“Ədəbiyyat adamı” mükafatının hər il may ayında beş nəfərə təqdim edilməsi nəzərdə tutulub.