Dünya şöhrətli Norveç yazıçısı Anre Svingen ilə görüş keçirilib.
Sim-sim.az xəbər verir ki, görüşdə Azərbaycan Dillər Universitetinin rektoru, akademik, Xalq yazıçısı Kamal Abdulla, şair, esseist, Sim-sim.az ədəbiyyat saytının baş redaktoru Qismət Rüstəmov, yazıçı, Yaradıcılıq fakültəsinin dekanı Mübariz Örən və fakültənin tələbələri iştirak ediblər.
Kamal Abdulla və Anre Svingenin fakültə tələbələri ilə mifologiya dərsi formatında keçirdiyi görüşdə Azərbaycan və Norveç ədəbiyyatında mifoloji obrazların, onların ədəbiyyata təsiri haqqında müqayisəli söhbəti olub.
Universitetin rektoru “Kitabi Dədə Qorqud” dastanı və dastandakı mifoloji hadisələr, dastanın Azərbaycan dilinə təsiri haqqında məlumat verib.
Anre Svingen öz növbəsində “Kitabi Dədə Qorqud” dastanını yüksək qiymətləndirərək öz ölkəsinin ədəbiyyatı və ədəbi tarixi, mifologiyası haqqında məlumat verib. Norveç və Azərbaycan ədəbiyyatının bir-birindən bəhrələnməsinin vacibliyi vurğulanıb.
Görüş tələbələrin sualları ilə davam edib.
Sonda rektor Anre Svingenə “Kitabi Dədə Qorqud” və Azərbaycan haqqında kitablar hədiyyə edib.
Görüş iştirakçıları xatirə şəkili çəkdirib.
Xatırladaq ki, Arne Svingen Azərbaycana “Sınmış burunun nəğməsi” adlı kitabının təqdimatı üçün gəlib.
Səttar Temuçin