sim-sim
No Result
Bütün nəticələr
  • Proza
  • Poeziya
  • Kino & Teatr
  • Yaradıcılıq fakultəsi
  • Mənim sevimli hekayəm*
  • Kamal Abdulla – 70
sim-sim

Alov İnanna. Zəngəzura gedən yolum (şeirlər)

10/10/2022 - 11:39
A A
Facebookda paylaş

Balta sapı

 

Dinlə məni Balta Sapı,

bir vaxt sən də Budaq idin.

Doğmaların yaxınında

Özgələrə uzaq idin.

 

Bir gövdədən su içərdik,

O suları qurutdunmu?

Bizi göylərə yönəldən

arzuları unutdunmu­?

 

Oduna dönəndən bəri

Ağac yanını danırsan.

Dəmiri güclümü gördün?

Özünü Balta sanırsan?!

 

Bülövlərə yalaqlanıb

Mişarlara qoşulmusan.

Bizə qalxan pis əllərə,

Dönüb tutalğac olmusan.

 

Nə kökümüz kəsiləcək,

Nə gücünüz çatar bizə.

Min budaq olub artmağa

Bir zoğumuz yetər bizə.

 

 

 

 

Zəngəzura gedən yolum

 

Yolum,

ilan kimi

qıvrılan yolum,

dağların başına

dolanan yolum,

sıldırım sal qayalara

söykənən yolum,

dərin dərələrlə

ürküdən yolum.

 

Böyrü bəzən bulaqlı,

bəzən çaylı-çaylaqlı,

bəzən daşlı-çıngıllı,

bəzən otlu-alaqlı –

Zəngəzura gedən yolum.

 

Üşənim tufanında,

islanım leysanında.

Qarışım buluduna

kor olum dumanında,

Zəngəzura gedən yolum.

 

Pozulmayan izli ol,

palçıqlı, ya tozlu ol,

tez olsun, ya gec olsun,

təki təkcə bizli ol,

Zəngəzura gedən yolum.

 

Qayaları yalçın yolum,

sim-sim deyim, açıl, yolum,

yenə sənin yolçun olum,

apar məni Zəngəzura.

 

Yenə balaca qız olum,

öz boyum boyda göz olum,

baxım, baxım doymaz olum,

apar məni Zəngəzura.

 

Anamın gəldiyi yerə,

gülünü dərdiyi yerə,

dərdindən öldüyü yerə –

apar məni Zəngəzura.

sim-sim

Sim-sim.az gündəlik köşə, araşdırma, esse, poeziya və nəsr nümunələri, eləcə də kino, teatr, musiqi, rəssamlıq, memarlıq və incəsənətin digər sahələrinə aid geniş spektrdə maraqlı materiallar təqdim edir.
Portalda ölkəmizdə və xaricdə çap olunmuş kitablar haqqında resenziyalar, tanınmış incəsənət xadimləriylə müsahibələr, müzakirələr və debatlar, dünya mədəni irsiylə bağlı tərcümə materialları dərc olunur.


Təsisçi: Kamal Abdulla
Baş redaktor: Qismət Rüstəmov
Şef redaktor: Ömər Xəyyam
Redaktor: Cavid Zeynallı

© sim-sim.az

No Result
Bütün nəticələr
  • Proza
  • Poeziya
  • Kino & Teatr
  • Yaradıcılıq fakultəsi
  • Mənim sevimli hekayəm*
  • Kamal Abdulla – 70

© sim-sim.az