MD (Maladaptive Daydreaming)
Kirpiklərin ağırlığı
süzülür yuxunun cizgilərindən
İstəklər
qanayır yarasız yerindən
İstiqamətsiz
Tapılmağa yönəlib
gələcəyə geri dönənlər
Açılmamış kitabların içində
qatlanmış vərəqlər
(“The secret life of . . .”)
Tornado
Soyuq silahlara möhürlənən
isti barmaq izləri
şah damarı ilə bağlanar
yerdən göyə yıxılan qaranlıqlara.
Gözdən itən görüntülərin
nəfəsinə zəncir tıxayar xatırlatmalar.
Günəşin sahilinə qədərsən,
mənsə tornadosuna qarışmışam
günün ilk saatlarının.
Müddət
İtirir gücünü
hiss edilənlər
zəlzələnin birinci dalğasında.
Dəmir barmaqlıqlar
örtülür
çiyinlərin üzərinə
Yaxınlaşır
ağrıların təsiri
müddətin bitişinə və
qurtulmaq
üstələyir həbs edilməyi
ölümsüzlük dəhşətinə.
Hörümçək toru
Birdən-birə
həddən artıq can atmaq
təhlükəsiylə örtülər
xilas edilmək növbəsi.
Hər şey qaydasında ikən
Əlini uzadarsan
və o an öldürülər
heç vaxt mövcud olmayanlar
Şəffaf hörümçək toru üzərində
gəzər bütün insanlar
bilə-bilə yıxılacaqlarını
və ya yem olacaqlarını.
