Yenə hardansa soyuq gəlir
Bir az bu səs-küylü biganəlik titrədir,
biraz boynuma sarılan əllər üşüdür.
danışırıq atıb gedənlərdən…
sonra susuruq
dünyanın ən qəddar adamlarında
Sonra hərəmiz bir küncdən qaldırırıq əllərimizi
Biraz Davudun səsindən
kövrəlirik,
biraz sonumuzu düşünürük,
danışırıq axşam-axşam
Gələni gözləyirik.
yenə susuruq dünyanın ən qəddar adamlarında
hərə bir ad çəkir
Yezid, Hitler, Səddam
bu dəfə hərəmiz eyni küncdən qaldırırıq əllərimizi.
Bəlkə, sən də dəyişərsən?
- düşünürəm ürəyimdə
Nə bilmək olar, dünyanın işidir
biz nə qədər çox susuruq
Allah daha çox eşidir
İkimizə bir mələk var başımızın üstündə,
bizi hər duamızda pusur.
sənin təsəllilərinə
“Xoşbəxtəm, mən xoşbəxtəm” yalanına
Tanrı özü də susur
Mənəm də
məni boş ver.
Heç olmasa düzün de,
hələ də bilmirsənmi
səndən sonra nələr oldu
neçə ildi alnımdakı qırışları pozuram…
indən belə
bəlkə ölümünə belə ağlamadım
Mən 14yaşımdan
əllərimi göyə qaldırıb
təslim oldum
indi ölümünə də
iki əlli hazıram…
*****
bir arı qondu çiçəyə, tək idi
Qıymadı dodaqlarına
Ətrini çəkdi
bir sərçə qondu pəncərəyə
çörəyi dimdiklədi
böldü üç yerə
Bu küçənin sonunda
Bir it üstümə hürdü
Bir tikə sevgim qalmışdı
Onu da it gördü
Bir ürək qızdırdım
Balaca evdə
Məni soyuqda bağışla
İsti də sev də
Bir dua yerdən götürdüm
Bir dua göydən
Məndən öncə əllərim ölür
Bir dua düşürdüm əldən
O da arxamca gəlir…
*****
Düz 12 il sonra oldu olanlar
Ay tutulması
Soyuq Noyabr
oturacağı yenicə qrılmış skamya
Üstündə qopardılmış gül
Böyrümdə oturmuş əsalı kişi
Bir də titrəyən barmaqlarında
Zikr etmək vərdişi
Düz 12 il sonra oldu olanlar
Ay tutulması
Soyuq Noyabr
Bu da hey ötür qulağımın dibində
“quru salfetka var”
“…quru salfetka var…”
Dilini dinc qoyammır…
*****
Uçurum da bir dönüşdü
geriyə qayıdanlara
Qayıdanın dilindən eşitdim
Duranın ürəyinin döyüntüsündən
Bir eşqin zirvəsindən boylandım
Baş barmağımdan süzülür adın
Ya Kərim
Ya Kərim
Dizlərin bükülməyi enməkdi
Enmək ucalmaqdı
Mənə yer de, yıxlmayım bu ucalıqdan
Yanına qalxım
Yanına gəlim.
*****
And olsun köksünü geniş qıldığın kəsə
Birdən içimi ölüm qorxusu bürüyür
Ölüm cazibə qüvvəsidi adamı yerə çəkir…
Yaşadıqlarım öz oxu ətrafında fırlanır başıma
Bir səs fısıldanır qulağıma küləkdə
Varam, varam- Günahkar olma
Üzünü gördüyüm bir adam gəlir yaddaşıma
Özümü unuduram
Peşmanlıqdan əyilirəm “vav” kimi
Alnımı torpağa qoyuram
“Çətindi” “çətindi” zikri
edir dilim
Özüm öz sözümü kəsirəm
Qulağım bir səs alır müəzzindən
İnnəma məal usri yusrən
*****
İçimdə “Sur” çalınıb
Yenə həmin səsdi qulağımda – əmr edir
Onurğandan qırıl düş səcdəyə
Yaşa bu eşqi, qayna bu qapıda
– Qovrul
Rahatlıq olmayan yerdə dincəlmə
boş qalma, yoruldun, qalx,
yenə yorul…..
Üzünü yerə tutan mələk
Əlini göyə qaldıran mələk
Biri gətirir, biri aparır damcı-damcı
Bu ömürdən nə qaldı ki, geriyə
Tənginəfəs adam qəbri, bir də kölgə
bu yağış o yağışa bənzəmirsə,
Mən də gedim
Nuhun gəmisinə çataram bəlkə…
