Sim-sim.az Cavid Fərzəlinin şeirlərini təqim edir:
Cavid Fərzəli (1987-ci il, Salyan rayonu)
Ayrılıq saatı
Ayrılığım, saatın neçədi…
Əqrəblərin sevgi üstündə
duran vaxtımı…?
…səni vaxtsız gözləyimmi
Saatı çarəsizlər kimi?
…gözünün ucundan itimmi
çantanda axtardığın bəhanələr kimi?
Baxışların saniyələrdi,
Bir dəqiqəmə gözlərin tamammı…:
Dilindən, saatın
şirin vaxtın eşidəcəyəmmi?
Əqrəblər zamanın ayaqlarıdı…
…bir anın gəlişin gözləyimmi?
Qolundakı saat zamanın qandalıdı,
Bu ömrü dustaq yaşayımmı…?
***
Sənə doğru
ürəyimdə bütün güllə yerləri sağ qaldı,
ölmədim qumruların nəğməsində, çiçəklərin dilində…
Sevda susandan bəri
ürəyim daha çox arxanca atılır sənin
qanadlarına tərəf yüyürən uçrumda
havaya sarılan yarasa gözlü dumanda…
Sənəcən qollarımın üstündə yaxın durdum
qıvrım qaranlıqdan asılan pəncərəyə,
eynəkli masalara…
Ürəyim yenə eyni tərəfə axır
durğun dənizlərdə, lal səmalarda…
Heyf bilməmişəm,
çiçəklərin doğulduğu gün ölürmüş bahar…
Günəşin əynindəsə
əlləri üşüyürmüş qışın.
…Və birdə də bu payızda
bütün yollar ölü daşımaqdan yorulub artıq…
Bağışla, ayrılığın əlindən ala bilmədim səni…
Axı buludlar ölüm ayağında qalıb yağışların əlində…
Axı bütün sabahlar
aydınlıqdan qıraq qalıb gecələrin əlində…
***
Şəkilindən asılan
bir yarpaq ömrü can atır payıza,
bir pişik təkliyə sürüyür ömrünü,
bir ayrılıq can verir gözlərinin əlində…
Burda günəşin də üzü soyuqdu,
içində sən olan günün də!
Duyuram ki, uğrunda ölmək yox,
silahlı əllərə sahib olmaqdır səni sevmək.
Heyif, küçələrin xəyanətini
bağışlayan bir kişi yaşayır ömrünü sənin indi.
Bu şəkilin əlində
dili söz kəsmir ayrılığın,
ürəyi yanır yağışların.
