Sim-sim.az Emin Əliyevin minimalist şeirlərini təqdim edir:
Sibirdə buzlar öz altında qamışları qoruyur,
Qamışa isə çox bənzəyir, bambuk ağacları.
Hansı daha əbədidir?
***
Hitlerin tankları insanların ona atdığı gülləri əzir
Ehtiram əlamətidir.
***
Müharibə.
Ən çox qanı
Sülhməramlılar tökdü.
***
Təbiət
gülə tikan,
heyvanlara qabıq verdi.
Amma biz hamısını dəlib keçdik.
Heyvanlarsa bir gün danışacaqdı,
Əgər insanlar onları yeməsəydilər.
Deməli, sivilaziya = insan rahatlığı.
***
Bayıl. Evlərin birində saat 23:00-dır.
Bayılda gün çıxmır, orada ancaq gecədir.
Bayılda mən radio dinləyirəm.
Moby mənə uşaqlığımı xatırladır,
Bir də 102 FM-i.
Bir də həmişə qulaqlıqlarda peydə olan DJ-in səsini.
***
Raufun xalası təkdir,
Şərifzadə küçəsində, uzun binanın sakinidir.
Evlənməyib, divardan asılan kəfkirli saatı da var.
Evə gələndə televizoru yandırır,
Televizor canlıdır, televizor onun evində yaşayır.
Kanalların proqramını əzbərləyib, bütün seriallara baxır.
Tez-tez 106-a zəng vurub saatı dəqiqləşdirir.
Hərdən, bir dəqiqə arxaya qalır saatı,
Hərdən ümumiyyətlə dayanır
Onda tez Raufa zəng vurur, deyir ki, saatım yenə xarabdır,
Bəlkə sizə gəlim?
***
Həyatımız iki yerə bölünür – iş saatlarına və qeyri-iş saatlarına.
Biz bir ailəyik – deməli, hələ peşəkar deyilik.
Lalə də bizim şirkətdə çalışır.
Onunla liftdə tanış olmuşam.
Özünə yeni eynək alıb.
Dostuma dediyinə görə Avropada universitetə hazırlaşır.
Üç qız, birlikdə üzbəüz binada kirayə qalırlar.
Lalə soft-roku sevir. Hər axşam Tolstoy küçəsində rok dinləyirlər.
Birdən Lalənin kibriti yerə düşür.
Ofisdə beş saniyəlik əsas duruş.
Dostum Lalənin üzünün niyə pörtdüyünü soruşur.
Bilmədiyimi deyirəm. Amma bilirəm.
Sonra ofisdə yenə həyat davam edir.
Soruşsalar bəs sən harada işləyirsən,
Onda deyəcəyəm:
saçı ortadan tökülməyə başlayan
kredit mütəxəssislərinin işlədiyi ofisdə.
***
Məişət dilindən başqa dil bilməyən dostum
həmişə belə deyir: “Bağışlayın, mən indi loru dilində danışıram.”
