Beynəlxalq Qadın Poeziya Festivalı FeminİSTANBUL bu il 1-3 noyabr tarixlərində üçüncü dəfə keçiriləcək.
“Birgəlikdə müxtəliflik” manifestiylə yolan çıxan FeminİSTANBUL qadınların problemləri ilə bağlı bəşəri fikir, sənət və dialoq platforması yaratmaq məqsədi güdür.
Festivalın təşkilat komitəsində Hilal Karahan, Dilruba Nuray Erenler və Emel Koşar var. Festivalda dünyanın hər yerindən gələn şairlər iştirak edəcək. Hindistan, Peru, ərəb ölkələrindən hər biri, İtaliya, Rumıniya, Bolqarıstan, İngiltərə, Serbiya, Bosniya, Albaniya, Almaniya, Macarıstan və digər ölkələrdən gələn şairlər öz ölkələrindəki qadınların problemlərini şeirlə dilə gətirirlər, birgə həll yolları axtarırlar və milli geyimlərində şeir oxuyurlar.
Birincisi 2016-cı ildə təşkil edilən festivalın ilk manifesti “Ana dilinə qarşı qadın dili” seçilib və mövzusu ədəbiyyatda və poeziyada qadını dilini analiz etməklə bağlı olub.
2017-ci ildə “Duzun sərhədləri” başlığı ilə mühacirlərin problemlərinə toxunulub və mühacirlərin şeirləri oxunub.
Bu ilin teması isə “Birgəlikdə müxtəliflik”dir. Temanı UNESCO-ya bağlı “World Festival of Poetry” (Dünya Poeziya Festivalı) təşkilatının qitələrarası direktoru və “Writers Capital Foundation”-nun (Kapital Yazıçılar Fondu) başqanı Hilal Karahan belə izah edib: “Dünyanın fərqli ölkələrində fərqli qadın problemləri ilə qarşılaşırıq. Biz qadınlar dəyişik, fərqliyik, müxtəlifik. Amma təməldə hamımız dünyanın və bəşəriyyətin məhsuldarlarıyıq. İnsanlıq varsa bizim sayəmizdə var. Biz qadınların ortaq mirası və ortaq özəlliyi bu müxtəliflikdir. Mütxəliflikləri qucaqlayırıq. Qadın olmağı qutlayırıq və bir hədiyyə hesab edirik. Bu qutlama, bu bayram üçün toplaşırıq. Dünyanın harasında oluruq olaq, həmişə birlikdə olmaq ümidiylə…”
Festival çərçivəsində əvvəlki illərdən fərqli olaraq bu şeir antologiyası da hazırlanacaq. “2018 Beynəlxalq FeminİSTANBUL Qadın Poeziyası antologiyası”na bütün dünyadan 55 şairin şeirləri toplanıb.
