İkincilərə…
Bax, Ameli, yenə dovşan çıxacaq
Bu uzunbığ sehrbazın əlindən.
Bax, verməsən o qırmızı dəsmalı
Heç nə gəlməz yaramazın əlindən.
Yenə sabah o filləri döyəcək
Qamçı onun, yarıtmaz zor onundu.
Xortumların dik tutar səni görcək
Mən bilirəm, fillər sənin dostundu.
Salar səni tənin boyda çənbərə
Tən ortadan…
bu şəlalə qamətin.
Sağ tərəfdə ayaqların tərpənər
Sol tərəfdə gülümsəyər sifətin.
İzlərimi tapdayan ayaqlarım
Qopsun, getsin, gəzsin ayaqlarınla.
Qoy uzanım bu qabırğa çənbərə
Alma yeyim gülümsəyən yarınla.
Hamı səni ikincitək alqışlar,
Bilməzlər ki, yeganə canbaz sənsən.
Heç kim belə gözəl yarı bölünməz,
Bax, Ameli, əsl sehrbaz sənsən.
