İMPAC Dublin mükafatının 2021-ci il qalibi meksikalı yazıçı Valeriya Luiselli olub. Yazıçının qalib gələn romanı “İtmiş uşaqlar arxivi” adlanır.
Valeriya Luiselli 1983-cü ildə Meksikada doğulub. Atası diplomat olduğu üçün uşaqlığı müxtəlif ölkələrdə keçən yazıçı fəlsəfə təhsili alıb, hal-hazırda Kolumbiya Universitetində dərs deyir. İlk kitabı “İzdihamda üzlər” romanı ilə “LA Times”ın “Art Seidenbaum – debüt roman” mükafatına layiq görülüb. Esseləri və hekayələri “New-Yorker Times”, “Granta” və “New Yorker” kimi nüfuzlu dərgilərdə çap edilib. 2014-cü ildə “National Book Foundation” tərəfindən 35 yaşa çatmamış gələcək vəd edən ən yaxşı beş yazıçıdan biri seçilib. Çağdaş Latın Amerika ədəbiyyatının ulduzlarından sayılır. Luisellinin ikinci romanı “Dişlərimin hekayəsi” İmpac Dublin mükafatına namizədlərin siyahısına düşmüşdü.
Yazıçının qalib olan “İtmiş uşaqlar arxivi” romanı ABŞ-Meksika sərhəddində baş verən tragik hadisələrdən bəhs edən eksperimental, yenilikçi əsər kimi qiymətləndirilib.
Yazıçı hal-hazırda Nyu-York şəhərində yaşayır.
Xatırladaq ki, dünyanın ən prestijli ədəbiyyat mükafatlarından hesab edilən İMPAC Dublinin mükafat fondu 100 min avrodur.
