Sim-sim.az xalq yazıçısı, akademik Kamal Abdullanın tanınmış tənqidçi, ədəbiyyatşünas Mehman Qaraxanoğlunun 65 yaşı münasibətilə yazdığı təbriki təqdim edir.
Əzizim Mehman Qaraxanoğlunun yaşı ahıllıq sərhədlərinə gəlib yetişdi. O bu illər ərzində nəyi qazandı, nələri itirdi? İtirdiklərini ondan yaxşı bilən olmaz. İtirdiklərini onun özü vaxt imkan verəndə təsbeh daşları kimi çevirib yada salmalı, götür-qoy etməlidir. Qazandıqlarını isə Mehmanın dostları bilməli və deməlidir.
O, hər şeydən əvvəl yaxın adamlarının əsl məhəbbətini, hörmətini qazandı. Azərbaycan ədəbiyyatına isə öz timsalında bir kişi adının əlavə edilməsini qazandırdı. Mehman Qaraxanoğlu professional tənqidçi, ədəbiyyat adamı adını qazandı. Gözəl müəllim, qayğıkeş dost adını, cəfakeş vətən övladı, hörmət və izzət sahibi olmağı qazandı. Məncə, bunlar üçün yaşamağa dəyər. Mehman imzası ciddi ədəbiyyat söhbəti var deməkdir. Mehman imzası mətnin dərinliyinə girmək bacarığı, eyni zamanda mətnin doğru-dürüst kontekstini müəyyənləşdirmək səriştəsi deməkdir. Mehman imzası yazarın pənahı və oxucunun dostu deməkdir. Yaxşı ki, varsan, əzizi-mən. Sən və sənin kimi nəcib ədəbiyyatçılar olmasaydı, nanəciblərlə baş çıxarmaq çətin olardı.
Sənə uzun ömür, cansağlığı və könül xoşluğu arzulayıram.
Sənə və yaradıcılığına dərin hörmətlə, dostun Kamal Abdulla.
