Ədəbiyyat üzrə Nobel mükafatı laureatı Mario Varqas Lyosanın “İmkansızın cazibəsi” kitabı çap olunub.
“Qanun” nəşriyyatında çapdan çıxan kitabı Azərbaycan dilinə Qismət Rüstəmov tərcümə edib.
Ədəbiyyat olmasaydı, dünya necə bir yer olardı? Ədəbiyyat insanlara həyatla bağlı nəsə öyrədirmi? Təhsilin çöküşü, mədəniyyətin və ədəbiyyatın geri plana düşməsi hansı nəticələri doğura bilər? Bütün bu suallara ədəbiyyat üzrə Nobel mükafatı laureatı Mario Varqas Lyosa müxtəlif illərdə dərc olunmuş esseləri ilə cavab verir. Həmin esselərdən seçmələr əsasında tərtib olunan bu kitabda XX əsrin ən yaxşı 25 romanı haqqında yazılar da var. Müəllif kitabda Nabokov, Kortasar və Borxes kimi görkəmli yazıçıların əsərlərini, ədəbiyyata və dünyaya baxışlarını şərh edir.
Xatırladaq ki, kitab “Qanun” nəşriyyatının yeni “Ustad dərsləri” seriyasından çıxıb. Bu seriyadan dünyaca məşhur müəlliflərin ustad dərsləri çap olunacaq.