AMİN (Azərbaycanın Milli İnkişafı Naminə) İctimai Birliyi “Mə’rifət inciləri” adlı rüblük ədəbi-irfani dərginin çapına başlayıb. Təsisçisi Seyyid Əsri, redaktoru Məhəmməd Nuridir.
Yalnız klassik ədəbiyyata dair məzmunları əhatə edən məcmuə öz yönündə təkdir. Hər nömrədə şərq klassiklərinin şeirlərindən öz vəznində tərcümə nümunələri verilir. Burada əski əlifbalı mətnlərə, əlyazma fotosurətlərinə, həmçinin ərəb, fars, çağatay, osmanlı və s. dillərdə olan ədəbi nümunələrə yer ayrılır.
Məcmuədə “Tərcümandur söz” adlı mənzum tərcümə nəzəriyyəsi, “Ver sözə ehya” adlı əski türk sözlərinin izahlı lüğətçəsi, “Şe’r bir zivərdür” adlı bəlağət fənləri, “Vəfa ədəbi məclisi” adlı müasir əruz şairlərinin yazdıqları nəzirə, təzmin, təxmis və s.-dən ibarət daimi bölmələr var.
Dərginin artıq 3 sayı nəşr olunub. İlk iki say ümumi olduğu halda, 3-cü say bütövlükdə Füzulişünas alim, qəzəlxan mərhum Hacı Mail Əliyevə həsr olunmuş xüsusi buraxılışdır ki, burada onun heç yerdə çap olunmamış şeirləri, Nəsimiyə şərhləri, haqqında xatirələr, əlyazmasının fotosurətləri və s. verilib.
2-ci sayda böyük mütəsəvvif Seyyid Yəhya Bakuvinin “Rümuz-ül-işarat” adlı risaləsi əsli və tərcüməsi birgə oxucuların ixtiyarına təqdim edilib. Gələcək saylarda təkcə şərqli müəlliflərdən deyil, ingilis, rus, alman və s. dillərdən də irfani-təsəvvüfi, elmi-ədəbi məqalələrin tərcüməsinə yer ayrılması nəzərdə tutulur. Məcmuə mütəxəssislər üçün əsaslı mənbə, söz xiridarları üçün isə yadigar olası töhfədir.
Dərgini əldə etmək istəyənlər kitab dükanlarına və ya AMİN İctimai Birliyinin sosial şəbəkə səhifələrinə müraciət edə bilərlər. Qeyd edək ki, yaxın günlərdə amin.az saytı da fəaliyyətə başlayacaq və burada birliyin yeni layihələri izləyicilərin xidmətinə təqdim ediləcək.
