Noyabrın 7-də Azərbaycan Dillər Universitetində “Yaradıcılıq Fakültəsi”nin təşkilatçılığı ilə şair, tərcüməçi Azad Yaşarla görüş keçirilib. Görüşdə fakültə rəhbərliyi, müəllimlər və tələbələr iştirak edib. Tədbiri giriş sözü ilə açan “Yaradıcılıq Fakültəsi”nin dekanı Qismət Rüstəmov tədbir iştirakçılarını salamlayıb, şairin həyat və fəaliyyətindən, bu görüşün bədii yaradıcılıqla məşğul olan tələbələr üçün xüsusi əhəmiyyətindən bəhs edib. Görüşdə müasir Azərbaycan ədəbiyyatı, tərcümə və kitab nəşriyyatı haqqında söhbət açılıb.
Şair, tərcüməçi Azad Yaşar son dövrlər tərcümə və ədəbi əlaqələrin qurulması baxımından bir çox işlərin görüldüyünü, dünyagörüşlü və intellektual gənclərin ədəbiyyata maraq göstərməsinin sevindirici olduğunu söyləyib. Görüş zamanı müəllif deyib ki, ədəbiyyatla məşğul olan həs kəsin tərcümə ilə maraqlanmağı vacibdir. Qonaq ədəbi cərəyanlar, müasir ədəbi birliklər və ədəbi imzalar barəsində maraqlı fikirlər səsləndirib. Sonda müəllif tələbələrə imzalı kitablarını hədiyyə edib.
