“Gatsania”
Gecələr gözəl görsənir
Dərdli, yorğun olanlara.
Yeni yollar açılmırmı,
Kədərindən doyanlara?
Mən içimdə arzuları böyüdürəm
Hüzn məni kiçiltdikcə,
Sanki, payız yarpağıyam; soluram incə-incə,
yavaş-yavaş,
Bilirəm: bitməyəcək ölümlə yaşam arasında
Vicdanları sızıldadan zalım savaş…
Bu şəhərdə sevinclər
Gatsania çiçəyitək açar qısa zamanlıq,
Bu şəhərdə dünya dolu insan var,
Çox kiçicik insanlıq…
“Ruhun fəryadı”
Əvvəl ruhum başqaydı,
İncinsəm də, getməzdim.
Hər gün yağış yağsa da,
Mən payıza küsməzdim.
İndi ruhum fərqlidir,
Biraz rəngsiz: ağ-qara.
Həyat nələr çəkdirir,
Bircə ömürlük cana.
Hər kəs kimi bu ruh da,
Rəngdən-rəngə girəcək.
Hərdən çiçək açacaq,
Hərdən donub öləcək.
“Özləmin rəsmi”
Göydən həsrət yağır,
gözlərdən yağış,
Sonsuz bir özləmin
rəsmidir payız.
